A parroquia de Santiago de Gresande, cruzada pola estrada de Vilatuxe a Prado, é unha terra cha presidida por un castro que presenta unha organización defensiva que o gran estudioso da morfoloxía castrexa López Cuevillas consideraba como unha das máis completas do noroeste peninsular. Baixo o subsolo de Gresande remata, cunha pequena ramificación, un dique de pegmatitas -descuberto e estudiado nos anos trinta por Parga Pondal-, que comeza en Lodeiro e Vilatuxe e que conta cunha lonxitude de seis quilómetros. Segundo os expertos, este filón constitúe un dos xacementos de litio máis importantes de Europa, xa que nas súas pegmatitas graníticas atópase a espodumena, un silicato natural de aluminio e litio moi pouco frecuente. Festividade: Santiago

Poboación: 233 habitantes

Extensión: 3,9 quilómetros cadrados

Densidade de pob.: 59,74

Altitude máx.: 521 metros

Código postal: 36519

Distancia a Lalín: 6 quilómetros

Lugares: Ínsua, Porreiros, Ramil, Souto e Vales .

Lalín

No eido da antropoloxía cultural, cabe sinalar que a parroquia de Gresande celebra festas na honra do patrón e de San Ramón "o das preñadas". Tradicionalmente, nestes eventos os veciños ían de xeonllos na procesión baixo a imaxe do santo, ó que lle ofrecían candeiras, cacheiras e outras esmolas.